కాకమ్మ కబుర్లు

కాకమ్మ కబుర్లు

మనకు మన ఇంటికి రోజూ వచ్చే కాకి సంతతికి ఎంతో అవినాభ

సంబంధం వుంది. నిత్య జీవితంలో కాకిని తలచుకోని రోజుంటుందా?

సామెతలగా , కధలుగా చెప్పుకుంటూనే ఉన్నాం. అంతెందుకు మన

పితృదేవతలకు ప్రతిరూపాలుగా భావిస్తాం. భోజనానికి కూర్చోబొయే

ముందు మొదటి ముద్దను కాకికి పెట్టి నోట్లో వేసుకోని వాళ్ళు చాలా

మంది ఉంటారు. వాల్మీకి రామాయణంలో కూడా కాకి గురించి ఓ

కధ వుంది.సీతమ్మ తల్లికి హాని తలపెట్టిన కాకాసురిడిని ధర్భాస్రం

ప్రయోగించి క్షమించమని వేడుకొంటే ఒక కన్ను పోగొట్టీ ఆ ఏకాకిని

ఏకాక్షిగా చేశాడు రామచంద్రుడు. అందుకే ఆ నాటి నుంచి ఓ కన్ను

పోయి తలవంచి ఒకే కన్నుతో చూస్తుంటుంది పాపం కాకి. ఆ కాకా

సురిడి పేరును తమ పనులకోసం పొగిడే వాళ్ళను వాడొట్టి కాకా

సురుడు అని పిలవటం పరిపాటి అయింది. పూర్వం కోడి కూయగానే

లేచే వారు. ఈ కాలంలో కాంక్రీట్ జంగిల్గా మారిన పట్టణాలలో కోళ్ళు

పాపం తలక్రిందులుగా వేలాడుతూ ఏ సైకిల్ హాండిల్ పైనో , లేక పోతే

వాటి మాంసం అమ్మే దుకాణాల్లోనో మనం చూస్తున్నాం. ఇప్పుడు

మనం లేపటానికి వెలుగు రాగానే "ప్రేమనగర్" సిన్మాలో జ్యోతిలక్శ్మిలా

"లేవనంటావా,నన్ను లేప మంటావా" అంటూకాకులు కావుగీతాలు ఆలపిస్తు

న్నాయి. అసలు ఉదయాన్నే ఇలా కాకులు కావు కావుమని అరవ

టానికి కారణం ఏమిటీ అన్న దానికి చాలాఏళ్ళక్రితం చందమామలో

ఓ చక్కని కధ పడింది. (చూడండి:kappagantu SivaramaPrasad గారు

నిర్వహిస్తున్న manateluguchandamama.blogspot.com ) ఆ

కధలో తమ్ముడు తన పదహారేళ్ళ అక్కను "అక్కా, పొద్దున్నే కాకులు

ఎందుకు అలా గోలగా అరుస్తాయి " అని. అడిగితే అక్క "చీకటిని తన

కిరణాలతో నశింపజేస్తూ ఉదయిస్తున్న సూర్యుడు నల్లగా ఉన్న తమనీ

చీకటి అని భ్రమించి దహిస్తాడేమోనని " మేం చీకటిని కాము, కాకులం

కావు, కావు (రక్షించు,రక్షించు) అని అరుస్తాయి" అని జవాబిచ్చిందట.

ఇంత మంచి కధలను అందించగల పత్రికలు ఇప్పుడేవి? మన ఇంటికి

చుట్టాలొస్తుంటే ఇంటి పైకి వచ్చి కాకి అరుస్తుందనే వాళ్ళు.. ఇద్దరికి

విరోధమొస్తే "ఆ ఇంటి మీది కాకి ఈ ఇంటి మీద వాలదు" అంటారు.

ఎవరితోనూ కలవకుండా ఒంటరిగా వుండే వాడిని "ఏకాకి" అంటారు.

ఊరికే పనికిరాని మాటలు మాట్లాడే వాళ్ళను వాళ్ళవి "కాకమ్మ

కబుర్లు లేరా" అని కొట్టి పడేస్తాం. ఇక కాకికి కధలూ ఎన్నో. కుండ అడుగున

ఉన్న నీటిని అందులో గులకరాళ్ళు పడేసి తాగి చక్కా ఎగిరిపోయిన కాకి

కధ మనందరికీ తెలుసు. కాకమ్మ-నక్కబావ కధకు ఎన్నో సీక్వెల్స్

వచ్చాయి. "నువ్వు లతాలా పాడుతావంటే నోటిలోని రొట్టెను కాలిక్రింద

పదిలంగా ఉంచుకొని పాడిన కాకి, ఇలా లాభం లేదనుకొని నువ్వు అద్భుతంగా

డాన్స్ చేస్తావని పొగిడితే నోట్లో పెట్టుకొని డాన్స్ చేసిన కాకి, ఈ సారి ఇలా

కాదని నువ్వు ఆటా, పాటా కలసి బాగా చేస్తావని నక్క బావ అంటే రొట్టెను

గుటుక్కున్న మింగి ఆటాపాట ప్రదర్శించిన కాకి కధలు సీక్వెల్స్ గా

వచ్చాయి. పిల్లలు ఎంత అల్లరి చేస్తున్నా పట్టించుకోని వాళ్ళను, "అవును

కాకి పిల్ల కాకికి ముద్దంటారు." కొందరు మాత్రం అలా అల్లరి చేస్తూ కేకలేసే

బుడుగుల్ని " ఇక ఆపుతారా ఆ కాకి గోల అని వీళ్ళూ కేకలేస్తారు! తన

ప్రతాపం ఎదుటి వాడికి తెలియదని చెప్పటానికి " పిల్ల కాకికేం తెలుసు

ఉండేలు దెబ్బ" అంటారు. సడన్ గా మాయమై పోయే వాళను , "ఇంకెక్కడ

కనిపిస్తాడు. వాడెప్పుడో ఉష్ కాకి అనడం వినే ఉంటారు. హాస్యబ్రహ్మ జంధ్యాల

సినిమాలో ఈ డైలాగు విన్నారు కదూ. "కాకీక కాకికి కాక కుక్కకా? "ఇందులో

అన్నీ " కా " లే !. ఒకే పండు మన దగ్గర ఉంటే చొక్కాలో ఉంచి కొరికి స్నేహితుడి

తో తినటానికి " కాకి ఎంగిలి" అంటాము. నలుపు అని చెప్పటానికి కాకి నలుపు

అంటూ వర్ణిస్తాము. అన్నట్లు తెల్ల కాకులూ ఉంటాయి సుమా. . ఇక మా తూర్పు

గోదవరి జిల్లా కేంద్రం పేరు తెలుసుగా ! " కాకి " నాడ.. , కీకారణ్యం అని చెప్పటానికి

కాకులుదూరని కారడవి చీమలు దూరని చిట్టడవి అంటారు. అతి అల్పం అనడానికి

ఏముంది సముద్రంలో కాకి రెట్ట అంటారు. నకిలీ బంగారాన్ని కాకి బంగారం

అంటారు. ఏమని వివరించను ఎన్నని చెప్పను ఈ కాకమ్మ కబుర్లు.

టైమ్స్ ఆఫ్ ఇండియా పత్రికలో ఇటీవలదాకా ఎన్నో కార్టూన్లు గీసిన పద్మభూషన్

శ్రీ ఆర్కే లక్శ్మన్ గారికి కాకులంటే ఎంతో ఇష్టం. ఆయన కాకుల్ని జీవకళ

ఉట్టిబడేటట్లు చిత్రరచన చేశారు. ఇక్కడ మీరు చూస్తున్న కాకుల బొమ్మలు ఆయన

కుంచె నుంచి తయారయినవే !( Courtesy : Times Of India )

చందమామయ్య చక్రపాణి

మా చందమామయ్య చక్రపాణి

ఆ నాటి పాఠకులకు శ్రీ చక్రపాణి బెంగాలి నవలలను తెలుగులోకి

అనువదించిన రచయితగా తెలుసు. మరి కొందరికి "ఆంధ్రజ్యోతి"

మాస పత్రిక ద్వారా తెలుగు సాహిత్యాన్ని కొత్త దారులకు తీసు

కొని వెళ్ళిన సంపాదకుడిగా తెలుసు. 12 భాషలలొ "చందమామ"

ద్వారా పిల్లలకు విజ్ణాన వికాసాలను, చదివే అలవాటును పెంచిన

మావయ్యగా ఆ రొజుల్లో ని పిల్లలకు తెలుసు. స్క్రీన్ ప్లే రచయితగా

నిర్మాతగా సినిమా ప్రేక్షకులకు తెలుసు. ఆయన హైదరాబాదులో

కొంత కాలం "యువ" మాసపత్రికను నిర్వహించారు. "కినిమా"

పేరిట సినిమా మాస పత్రికనూ నడిపారు.

శ్రీ చక్రపాణి దేవదాసు లాంటి బెంగాలి నవలలను అవి తెలుగు నవలలే

అన్నట్లుగా అనువదించారు. ఆయన స్వయంకృషితో బెంగాలీ నేర్చు

కొన్నారు ముక్కుసూటిగా నిర్మొహమాటంగా మాట్లాడటం ఆయన

అలవాటు.

నేనంటే నేనే

ముళ్ళపూడి వెంకట రమణగారు ఒక సారి చక్రపాణిగారి వద్దకు

ఇన్ట ర్వ్యూ కోసం వెళ్ళి ఇలా అన్నారు.

" నేను ఆంధ్రపత్రిక నుంచి వచ్చానండి"

" ఎందుకూ"

" మీతో ఇంటర్వ్యూ చేసి"

" ఎందుకూ"

" మీ గురించి రాద్దామని"

" నా గురించి చెప్పడానికి ఏముంది.. నువ్వు రాయడానికేముంది.

నేను నేనే "

"అంతేనా"

"అంతేగదా" అలా ఇన్టర్వ్యూ ముగిసింది.

అలా నిర్మొహమాటంగా సమాధానాలు చెప్పడం చక్రపాణి గారికే చెల్లు!

చక్రపాణి గారు తనమీద తనే జోకులు వేసుకుని, విమర్శించుకోవడం

కూడా వుంది , మన బాపుగారిలా. " చంద్రహారం" సినిమా దెబ్బతిన్న

తరువాత, " ఎందుకు దెబ్బతినదూ ? ఎప్పుడు చూసినా హీరో నిద్దర

పోతుంటే ఎవడు చూస్తాడూ?" అన్నారట ఆయన. మరోసారి యన్టీఆర్

"దాన వీర శూర కర్ణ" ప్రారంభిస్తూ" నేను కృష్ణుడు,ధుర్యోధనుడు,కర్ణుడు

మూడు పాత్రలూ వేస్తున్నాను , దర్శకత్వం కూడా నేనే " అని ఆయనతో

చెప్పారట. డబ్బాలోంచి పొడుగాటి సిగరెట్ తీసి వెలిగించి ఘాటుగా పొగ

పీల్చి " బానే వుంటుందిలే. మూడు ఏషాలూ బాగానే చేస్తావు.డైరెక్షన్

కూడా పెట్టుకున్నావు.అన్ని వేషాలూ నువ్వే ఏసేస్తే చూసిన జనం నువ్వు

కక్కూర్తి పద్దావనుకుంటారేమో అది ఆలోచించు" అన్నారట చక్రపాణి.

ఆయన మాట తీరు తెలిసిన మనిషి కనుక రామారావు చిరునవ్వు నవ్వి

ఊరుకున్నారట.

చక్రపాణి జయంతి.నాడు ( 05.ఆగష్టు) ఆ మహావ్యక్తికి జోహార్లపిస్తూ.............

( "హాసం" హాస్య సంగీత పత్రికలో శ్రీ రావి కొండలరావుగారి వ్యాసం, సాహిత్య

అకాడమీ ప్రచురణ ,వెలగా వెంకటప్పయ్య రచన "చక్రపాణి" పుస్తకం ఆధారంగా)

బొమ్మబొరుసూ

బొమ్మ బొరుసూ

బాపు గారి బొమ్మకి, రమణగారి రచనకి 50 ఏళ్ళు

(15-6-1995) వచ్చిన సంధర్భంగా, ఆ సంతోషానికి

గుర్తుగా నవోదయావారు బొమ్మ బొరుసూ పుస్తకాన్ని

అచ్చొత్తారు. బాపురమణలు అమెరికా చికాగోలో జరిగిన

ఆ నాటి సభకు ఈ పుస్తకాన్ని కానుకగా సమర్పించారు.

ఇందులో పత్రికలలో తప్ప పుస్తకంగా రాని రమణగారి

రచనలూ బాపుగారు ఎప్పుడో రాసిన రెండు కధలూ

(మబ్బూ _వానా _మల్లె వాసనా, అమ్మ _బొమ్మ)

వివిధ రచనలకు గీసిన బొమ్మలు చోటు చేసు

కున్నాయి. అన్నీ కలసి "బొమ్మాబొరుసూ" అయింది.

ఆంధ్రసచిత్ర వార పత్రిక, ఆంధ్రప్రభ వార పత్రిక, జ్యోతి ,రచన

లనుంచి ఈ రచనలను సేకరించి ప్రచురించారు. ఇంకా

ఇందులో 1945 "బాల " పత్రికలో బాపుగారు వేసిన మొదటి

బొమ్మ, రమణ గారి తొలి రచన కూడా మనం చూడోచ్చు!!

ఇలా ఈ అమూల్య రత్నాలను ఏర్చి కూర్చినది ప్రఖ్యాత రచయిత

శ్రీ యమ్బీయస్.ప్రసాద్ గారు..

ముక్తాయింపుగా ఇందులోని శ్రీ వెంకట రమణ గారి జోకు :

* * * * * * * * * * * * * * * * * *

కుర్రాయన : మా ఆవిడ పెళ్ళయిన కొత్తలో హార్మనీ

వాయించేది. పిల్లలు పుట్టాక మానేసింది.

పెద్దాయిన : సంతానం వల్ల కొన్నిసుఖాలు లేక పోలేదోయ్ !

* * * * * * * * * * * * * * * * * *

స్నేహానికి ఒక రోజా ? !

ఆగస్ట్ ఒకటివ తేదీ స్నేహితుల రోజట ! మరి మిగతా రోజుల

మాటేమిటి ? మనకు మంచి స్నేహితులు ఏడాది పొడుగునా

కావాలి.

తీయనిదీ, విడతీయనిదీ స్నేహం !

ఆ స్నేహానికి ఏడాదికి ఒక రోజా ? !

బంధాలతో ఏర్పడేది బంధుత్వాల అనుబంధం !!

కష్టాల్లో, నష్టాల్లో కలకాలం నిలిచేదే స్నేహానుబంధం !!

ఎన్నో ఏళ్ళ బాపు రమణల మైత్రీ బంధం !!

అలాటి ఎన్నెన్నో స్నేహాలకి ఏడాదికి ఒక రోజా ?

అందిద్దాం ఆ స్నేహానికి ప్రతి రోజూ ఓ రోజా ! !

విజయాధిపతులు చక్రపాణి, నాగిరెడ్డి జంటను ఈ సంధర్భంగా

స్మరించుకుంటూ , స్నేహానికి గుర్తుగా గత ఆగస్టులో నాకు

కానుకగా "స్వాతి కార్టూన్ల " పుస్తకాన్ని కానుకగా అంద

చేసిన ఇద్దరు మితృలు శ్రీ బాపు, శ్రీ ముళ్లపూడి వెంకట రమణ

గార్లకు, ప్రియ మితృలు , ప్రఖ్యాత కార్టూనిస్ట్ డాక్టర్ జయదేవ్

గారికి నన్ను అమితంగా అభిమానిస్తూ నన్ను కలవడానికి

ప్రత్యేకంగా రాజమండ్రి వచ్చిన బ్లాగర్ మితృలు శ్రీ కప్పగంతు శివ

రామ ప్రసాద్ గారికి, నా చేత బ్లాగును ప్రారంభింపజేసిన మరో

మితృలు శ్రి భమిడిపటి ఫణిబాబు దంపతులకు, నా బ్లాగును

అందంగా తీర్చిదిద్దటంలో సహకారం అందజేసిన దేవుడిచ్చిన

మరో అమ్మాయి చి.సౌ.జ్యొతివలబొజుకి మా "హాసం క్లభ్"

మితృలు దినవహి వెంకట

హనుమంతరావు, ఖదర్ ఖాన్ లకు, బ్లాగర్ మితృలకు

స్నేహాభినందనలు !

ఇచ్చట కొంపలు కూల్చబడి (ఏ) మార్చబడును

ఆమాయకరావు వాస్తు శాస్త్ర ప్రవీణ జంబుకశాస్త్రి ఇంటికి వచ్చి

"నమస్కారం, జాతకరత్న, వాస్తుబ్రహ్మ జంబుక శాస్త్రి గారూ"అని

పలకరించగానే, " రండి, రండి అంటూ ఆహ్వానించాడు జంబుక

శాస్త్రి.

"గురువు గారు, నిన్న మీరు మా ఇల్లు పావనం చేసి మా ఇంటికి

వాస్తు దోషాలేమైనా వున్నాయేమోనని చూశారుగా. కొంపదీసి

మార్పు లేమైనా చేయాలని చెప్పరు కదా" అని భయం భయంగా

అడిగాడు. " అదేమిటి అమాయకరావు గారు, కొంపదీసి అంటారేం?

వాస్తు అంటేనే కొంపలు తీయటం ! మీ ఇంటికి మార్పు అవసరం

లేదు. ఆ వీధిలోనే , అక్కడే , అదే చోట , అవే పేర్లతో గదులుంటాయి."

చెప్పాడు జంబుక శాస్త్రి. అమాయకరావు ముఖారవిందం ఆనందంతో

ఇంతయింది. " బ్రతికించారు, ఇంకేం చెబుతారోనని మా భార్యాభర్తలిద్దరం

తెల్లవార్లూ నిద్దర పోకుండా రామ్ గోపాలవర్మ హర్రర్ సినిమా చూసి

వచ్చినట్లు హడలి భయపడిపోయాము" అన్నాడు.

అలా అనగానే జంబుకశాస్త్రి , "మీరేం పడకండి. పడవల్సింది మీ ఇంటి

గోడలే ! మార్చాల్సింది ఇంటి పునాదులే !! ఇంతసేపు సంతోషపడ్డ

అమాయకరావు " గదులు మార్చనవసరం లేదని ఈ కధ ప్రారంభంలో

శెలవిచ్చారు, మళ్ళీ ఇక్కడకు వచ్చేటప్పటికి పునాదులంటున్నారు"

అన్నాడు భయంగా. అందుకు జంబుకశాస్త్రి " ఏవిటీ, పెడర్ధాలు తీస్తున్నావు.

గదులు మార్చక్కరలేదని మరోసారి చెబుతున్నాను.ఎలాగంటే, వంట ఇల్లు,

పదగ్గది,బాతు రూము కొంగ గదీ ,అదేనయ్యా స్నానాల గదీ , హాలూ వాటి

పేర్లు మారవు. అవే పేర్లతో ఇప్పుడున్న చోట కాకుండా మరో వైపుకు

మారతాయన్నమాట. ఒకే చోట వుంటే పాపం వాటికి మాత్రం బోరు కొట్టదూ !"

అన్నాడు ఈనాటి సినిమాల్లో హాస్యంలా జోకేసానని గర్వంగా.. " బాబోయ్,

నిజంగా మీరు నా కొంప ముంచారు. కొంపతీసి మళ్లి కట్టడానికి నా దగ్గర అంత

డబ్బు లేదు." అన్నాడు అమాయకరావు. " డబ్బు లేదా? ఎలా వుంటుంది ?

మీ కొంపకు వాస్తు దోషముంటే ! ఆకస్మిక ధనలాభం కలిగే సులభ మార్గం

నే చెబుతా గదా " అని జంబుకశాస్త్రి అనగానే " ఏం చేయా"లని ఆతృతగా

అడిగాడు అమాయకరావు. " చాలా సులువయ్యా, సింపుల్ గా నెలకు ఓ

ఐదు వేలు ఓ 24 నెలలు సింపుల్ ఇన్స్టాల్ మెంట్స్ లో నాకందజేశావనుకో,

నేను నెలనెలా స్పెషల్ పూజ చేసిన చక్రం ఇస్తా ! దాంతో ఆకస్మిక ధన లాభం

తప్పక కలుగుతుంది. నిజం.నువ్వు నా మాట నమ్మాలి" అన్నాడు జంబుకం.

ఎందుకో అమాయకరావుకు మాయలు తొలగటం మొదలయింది. "ఆకస్మిక

ధన లాభం నాకేమోగాని, మీకు మాత్రం తప్పక కలౌగుతుంది, ఇది కూడా

నిజం" జవాబిచ్చాడు అమాయకరావు.

"ఛూశావా, ఇంకా మొదటి వాయిదా కట్టకుండానే, పూజ మొదలు పెట్టకుండానే

వాస్తు దోషం తగ్గుతూ నీ రోజులు దగ్గరపడ్డాయి. తెలివి వచ్చేస్తున్నది" అన్నాడు

జంబుకశాస్త్రి. " అలానేనండి, ఈ లోగా నాగురించి, నా భార్య గురించి

కొంచెం చెబుతారా? అంటూ అడిగాడు అమాయకరావు. వెంటనే జంబుకశాస్త్రి

దానికేం భాగ్యం ! నేను ఇప్పుడు చెప్పే జోస్యం వల్ల నీకు నా మీద ,వాస్తు మీద

పూర్తి నమ్మకం ఏర్పడుతుంది. "నీ భార్య ఇప్పుడు సుమంగళి. నువ్వు బ్రతికున్నంత

వరకూ ఆమె మాంగాళ్యానికి ఢోకాలేదు" అంటూ వెకిలి నవ్వు నవ్వాడు.

వివేకరావుకు ఆ ఇంటీ గుమ్మం దిగగానే పూర్తి జ్ణాణోదయమయి, వివేకరావుగా

మారి తన పాత ఇంట్లోనే హాయిగా పిల్లా జెల్లాటొ ఉంటున్నాడు.

( ప్రతి నెలా మూడో ఆదివారం జరిగే మా "హాసం క్లబ్ " కోసం నే వ్రాసిన స్కిట్ కు

కధారూపం .).