అక్కయ్యతో ఆటవిడుపు !

సరోజిని అక్కయ్య చేసిన బొమ్మలు!

ఈ ఫొటోలో మొదట లంగాపై గౌను వేసుకొని కూర్చున్నది

మా అక్కయ్య. సరోజిని. మధ్యలో నిలుచున్నది నేను. ఆ

ప్రక్క వున్నది చెల్లాయి కస్తూరి. మొగపిల్లవాడిలా నిక్కరు,

చొక్కావేసుకున్నమరో ఫొటో అక్కయ్యదే. ఇప్పుడు అక్కయ్య

వయసు 73 ఏళ్ళు. ఐనా ఎంతో యాక్టివ్ గా వుంటుంది.

చిన్నప్పటినుంచి అక్కయ్యకు సినిమాలంటే చాలా ఇష్టం

భానుమతి అభిమాన నటి. చదివిన కధ ఐనా, చూసిన

సినిమా కధ ఐనా చాలా వివరంగా చెప్పేస్తుంది. ఇక రక

రకాల వంటలు ,పిండి వంటలు అద్భుతంగా చేస్తుంది.

కోడలికి వంటలో సహాయం ,సలహాలు ఇస్తూ ఎప్పుడూ

బిజీగా వుంటూ తీరిక దొరికినప్పుడల్లా రకరకాల బొమ్మలు

చేస్తుంటుంది. మిగిలిపోయిన సబ్బు ముక్కలను

జాగ్రత్త చేసి వాటి తో రకరకాల పువ్వులను చేసింది. మల్లె

మొగ్గలను వాసన చూస్తే అచ్చు మల్లెల వాసన వస్తాయి.

జాస్మిన్ వాసనవచ్చే సబ్బు ముక్కలతో వాటిని చేసింది.

అలానే ధర్మొకూల్ తో అపార్ట్మెంట్ బొమ్మలు , మొదలైనవి

చేసింది. మూడు రోజుల క్రితం నే వైజాగ్ వెళ్లినప్పుడు, "అబ్బాయ్!

చూడరా ఈ సబ్బుల పూలు " అని చూపించింది. వీటిని ఫొటొ

తీసి నా బ్లాగర్ మితృలందరికి చూపిస్తా అని అక్కయ్యకు

చెప్పి మీ కందరికీ చూపిస్తున్నాను. మా అక్కయ్యకు ఇద్దరు

అబ్బాయిలు. పెద్దవాడువిజయ భాస్కర్ అడ్వకేట్. కొంత కాలం

ETVలో లీగల్ అడ్వయిజర్ గా పనిచేశాడు. రెండో వాడు మోహన్

వైజాగ్ SBI ZONAL OFFICEలో ఆఫీసర్ గా పనిచేస్తున్నాడు.

మా బావగారు SBI లో పదవీవిరమణ చేసి వైజాగులో సెటిల్

అయ్యారు. చెల్లాయి కస్తూరి ( హైద్రాబాద్) పదేళ్ళవయసులోనే

"నేనూ, మా సంగీతం మాష్టారు" అన్న బొమ్మ 1954 ఆంధ్ర వార

పత్రికలో వేసి బహుమతి గెలుచుకొంది.

విశాఖ సముద్ర తీరంలో విజేత శ్రీరామ్ తో !!

అందాల విశాఖ సముద్ర తీరంలో మన తెలుగోడు చి" శ్రీరామ్ తో !!

ఆహా ! నిజంగా మన తెలుగువాళ్లందరికీ ఆగష్టు 15 ఎంత మంచి

రోజు . భలే మంచి రోజు , పసందైన రోజు అని(నాకు పాటలు పాడటం రాక

ఫొయినా) ఎలుగెత్తి పాడాలనిపించింది. రాజమండ్రిలో మా

మితృలు శ్రీ సి.బి.వి.ఆర్.కె.శర్మ గారు ( రాష్ట్రపతి అవార్డు పొందిన

విద్యాప్రదాత) గారి మేనల్లుడు కొడుకే మన శ్రీ రామ్ అని తెలిసి

నప్పుడు మరింత ఆనందించా. ఇంతటి సెలబ్రెటీ ని అందాల విశాఖ

తీరంలో మా బావగారు యమ్వీయల్యస్,మ్ ప్రసాద్ రావు గారితో

కలుసుకోవడం ఎంత అదృష్టం చెప్పండి. మరో విషయం శ్రీరామ్

మా కోసం ఓ పాట పాడుతుంటె , ఏనాడో అంతరించి పోయిన

డిప్లోడోకస్ కూడా తిరిగి వచ్చి శ్రీరామ్ పాటను పరవశించి వింటున్న

విషయం ఈ ఫొటొను తీసిన మా మేనల్లుడు అబ్బాయి ఛి'"సచిన్

చూపించిన దాకా తెలియనేలేదు సుమాండీ !!

నవ్వుల పూలంగి మన రేలంగి

నవ్వుల పూలంగి మన రేలంగి

నవ్వుల రేడు మన రేలంగోడు

తెలుగు సినిమా నవ్వుల రాజ్యాన్ని యేలాడు !

ఆయన వేసిన ప్రతి మాట ప్రతి అడుగూ నవ్వుల పూలంగే !!

ఈనాటికీ తెలుగు మనసులకు మరపురాని ఫీలింగే !!

* * * * * * *

రేలంగి మరణంతో తెలుగు సినిమాకు ఏ నాడో నూరేళ్ళూ

నిండాయి. ఈరోజు ఆ మహానటుడి శతజయంతి.

చొక్కాలు చింపు కోవడం, వెనక నుంచి తన్నించుకోవడం

బూతు మాటలు హాస్యం గా చెలామన వుతున్న ఈ

రోజుల్లో రేలంగి పండించిన హాస్యాన్ని తలచుకొని మళ్ళీ

మళ్ళీ నవ్వుకుంటూ వినోదాల విందులు చేసుకుందాం.

ఆయన మంచి మనసుగురించి శ్రీ రావి కొండల రావు

ఇలా వ్రాశారు.

* * * * * * * *

షూటింగ్ అయ్యాక తన కారులో వెలుతూ, " వెనక సీటు

ఖాళీ మాంబళం, మాంబళం ... " అని బస్సు కండక్టర్ లా

అరుస్తూ అసిస్టెంట్ డైరెక్టర్లని, చిన్న వేషాలు వేసే నటులను

ఎక్కించుకొని తీసుకొని వేళ్ళేవారు.

తెలుగు హృదయాల్లో రేలంగి చిరంజీవి !!

పురాణ కాలక్షేపం !!

దేముడనేవాడున్నాడా అని మనిషికి కలిగెను సందేహం అన్న

పాట విన్నట్లు గుర్తు ఈ మధ్యే ఒక మితృడు మన దేశంలో

ఇంత మంది భక్తులున్నారు. ఒకరికైనా ఆయన దర్శనం

ఇచ్చాడా ఆనిi ఆడిగాడు.పైగా ఇంకో మాట కూడా అన్నాడు.

దేముడున్నాడని అంటుంటావు కదా నువ్వు తరచు గుడికి

వెళ్ళినట్లు ,రోజూ ఇంట్లో పూజలు చేస్తున్నట్లు కనిపించలేదు

అన్నాడు. నిజమే, నేను గుళ్లకు వెళ్ళి చాలాకాలమయింది.

ఐనా నేను దేముణ్ణి నమ్ముతాను. నాకు పూజలు చేయటం

చిన్నప్పటి నుంచి అలవాటు కాలేదు. మా నాన్నగారు

ఉదయం 9 గంటలకల్లా బ్యాంకుకు వెళ్ళాల్సి వుండటం వల్ల

ఆయనకు పూజలు చేసుకోవటానికి టైము వుండేది కాదు.

ఒక్క వినాయకచవితికి మాత్రమే మా చేత వ్రతకల్పం చదివింఛి

పూజ ఛేయించే వారు. నన్ను పంచే కట్టుకోమనే వారు. అదొక్కటే

నాకు ఇష్టం ఉండేది కాదు. ఇప్పటికీ నాకు పంచె కట్టుకోవడం

రాదు. శుభ కార్యాలప్పుడు మా బావో, లేకపొతే పౌరోహితులో

కడతారు. చాలా మందిమితృలకు ఉదయం పూట ఫోను చేస్తే

పూజలో ఉన్నారండీ అని వాళ్ళ శ్రిమతి గార్ల నుంచి జవాబొస్తుంది.

నేను దేముణ్ణి ప్రతి రోజూ చూస్తూనే ఉంటాను. సూర్యోదయం

వేళ ఆకాశంలో, బాపూగారి బొమ్మలో, మంచి పుస్తకాల్లో , మాయా

బజార్ లాంటి సినిమాల్లో, ఘంటసాల, సుబ్బులక్ష్మి, సుశీల, జానకి,

బాలసరస్వతి మొదలైన వాళ్ళ పాటలు వింటున్నప్పుడు నాకు

దేముడు అగుపిస్తూనే ఉంటాడు. మనం చేసే తప్పులను దేముడు

అనుక్షణం గమనిస్తూనే ఉంటాడు.తప్పుడు పనులు చేస్తూ , అడ్డ దారుల్లో

డబ్బును సంపాదిస్తూ గుడికి వేళ్ళి ఓ దండం పెడితే పొంగిపోయి వరాలిచ్చే

అమాయకుడు కాదు దేముడు. గుళ్ళొను ప్రవర్తన బాగుంటుందా! క్యూలో

నిలబడిన పెద్ద వాళ్ళను తోసుకుంటూ ముందుకు వెళతారు.

ఇంకో విషయం గమనించారా. దేముడికి సంబంధించిన మాటలను

వ్యతిరేక భావాలను తెలియజేయడానికి మనం వాడటం మీరు గమనించే

ఉంటారు. ఎవరైనా ఒకడిని తిట్టారనుకోండి. వాడికి " అక్షింతలు " బాగా

పడ్డాయి అంటారు. మోసం చేస్తే " శఠగోపం " పెట్టాడు అంటారు. లేకపోతే

" పంగ నామాలు " పెట్టారంటారు. లంచం ఇచ్చి " ముడుపులు " చెల్లించా

మంటారు. డబ్బును దుర్వినియోగం చెస్తే " మంగళహారతి" పాడాడంటారు.

ఇక మన రాజకీయనాయకులు, కాసుకో నీ " పురాణం " విప్పుతా అంటూ

ఒకరినిఒకరు బెదరించుకొంటారు. తాగు బోతులను వాడు ఎప్పుడూ " పూజ "

లోనే ఉంటారు అంటారు. ఇక తిరుమలతో సహా దేవలయాల్లో జరుగుతున్న

అవినీతికి అంతే లేదు. వీటన్నిటినీ దేముడు గమనిస్తూనే ఉంటాడు. స్వర్గం

నరకం ఎక్కడో లేవు. సమయం చూసి భవంతుడు శిక్షించడం మనం చూస్తూ

నే ఉన్నాం. ఇక నా పురాణకాలక్షేపానికి స్వస్తి.

!

హెర్గే అద్భుత సృష్టి " టిన్ టిన్ " కామిక్స్

కార్టూనిస్ట్ హెర్గే అద్భుత సృష్టి " టిన్ టిన్ "

టిన్ టిన్ కామిక్స్ అంటె ప్రతి ఒక్కరికి ఇష్టం. అద్భుతమైన బొమ్మల

చిత్రీకరణ , కధావిధానం వల్ల "టిన్ టిన్ కామిక్స్ యావత్ ప్రపంచంలో

పాఠకుల అభిమనాన్ని సంపాదించింది. బెల్జియం దేశంలోని బ్రసెల్స్

నుంచి వెలువడే లావింగ్ టైమ్ సీస్లే అనే దిన పత్రికలో 1929 జనవరి

10 వ తేదీన టిన్ టిన్ పేర మొట్టమొదటి కామిక్ ప్రచురించారు.

ఆ కామిక్స్ 33 భాషల్లోకి అనువదించారు. ఆ పుస్తకాలు ప్రపంచ

వ్యాప్తంగా పది కోట్ల కాపీలకు పైగా అమ్మకాలు జరిగాయంటే పాఠకులను

టిన్ టిన్ ఎంతగా ఆకర్షించాడో అర్ధమవుతుంది. టిన్ టిన్ పాత్ర సృష్టి

జరిగి 80 ఏళ్ళయింది. ఈ అద్భుత పుస్తక సృష్టి కర్త హెర్గే తన 76 వ

ఏట 1983 లో మరణించాడు. ఈ కామిక్స్ పుస్తకంలో గీసిన గీతలు

ప్రస్పుటంగా ఉంటాయి. చందమామ లాటి గుండ్రని ముఖంతో, చిన్న

ముక్కు , విశాలమైన కళ్ళతో టిన్ టిన్ ఆకర్షణీయంగా ఉంటాడు..చాలా

కాలం టిన్ టిన్ బొమ్మలు రంగుల్లో వేయలేదు. 1947 నుంచే టిన్ టిన్

రంగుల్లో కనిపించడం మొదలు పెట్టాడు. హెర్గే ఫౌండేషన్ దగ్గర వున్న

ఒరిజినల్ కార్టూన్లను ప్రదర్శనకు ఉంచారట. మన పిల్లలు ఈ కార్టూన్

పుస్తకాలను స్వంతం చేసుకోవాలంటే ధర మాత్రం ఎక్కువ గానే

ఉంటున్నది. ఓ పదేళ్ళ క్రితం 60 రూపాయలున్న ఈ పుస్తకాలు ఇప్పుడు

250/- రూపాయలకు పైగా ఉండటం కాస్త బాధాకరమే ! ప్రభుత్వం

పిల్లల పుస్తకాలకు రాయితీ ఇచ్చే ఏర్పాటు చేస్తే మరింత మంది

చిన్నారులకు పుస్తకాలు చదివే అవకాశం కలుగుతుంది.